विशेष प्रतिनिधी
गांधीनगर: आईचे गेल्या 15 वर्षांपासून सुरू असलेले अफेअर संपविण्यासाठी दोन तरूणांनी भररस्त्यात
तिच्या प्रियकराची निर्घृणपणे हत्या केली. सर्वांसमोरच मृतदेहाचे तुकडे करत हवेत फेकून त्या दोघांनी पळ काढला. गुजरातच्या गांधीनगरमधील मोखासन गावात हा प्रकार घडला.
पोलिसांनी दिलेल्या माहितीनुसार त्या दोन तरूणाच्या आईचं गेल्या 15 वर्षांपासून अफेअर होते. मुलांना आईचं हे नातं मान्य नव्हते. त्यांनी आईला अडवण्याचा खूप प्रयत्न केला, पण तरीही तिने काहीच ऐकलं नाही.त्यामुळे त्यांनी तिच्या प्रियकराची निर्घृणपणे हत्या केली.
त्या मुलांच्या वडीलांचे बऱ्याच वर्षांपूर्वी निधन झाले आहे . मात्र त्यानंतर आईच्या या नात्यामुळे वडिलांच्या स्मृतीचा अपमान होतोय, अशी त्या मुलांची धारणा होती. रतनजी ठाकूर असे मृत्यूमुखी पडलेल्या व्यक्तीचे नाव आहे. ते व्यवसायाने गवंडी होते. त्याचे गावातील एका महिलेसोबत प्रेमसंबंध होते. या कारणावरून त्या महिलेची मुले संजय आणि जयेश ठाकूर हे रतनजीवर चांगलेच चिडले होते.
त्या दोघांनी यापूर्वीही रतनजींना आईपासून दूर राहण्याची धमकी दिली होती, पण तरीही रतनजींसोबत आईचं प्रेमसंबंध सुरूच होते. या वादामुळे जातपंचायतीही बोलावण्यात आली, मात्र त्यातही तोडगा निघाला नव्हता असे पोलिसांनी सांगितले.
