विशेष प्रतिनिधी
पुणे : विकास कामांमध्ये अनेक ठिकाणी पाट्या टाकायचे काम सुरू आहे. येथून पुढे हे खपवून घेतले जाणार नाही. बैठकीला येताना अधिकाऱ्यांनी केलेल्या कामाचा तपशील बरोबर घेऊन आलेच पाहिजे. मला कामाच्या दर्जात अजिबात तडजोड नको आहे. यापुढे विविध खात्यामार्फत केल्या जाणाऱ्या कामांच्या दर्जाची पाहणी करण्यासाठी एक लवकरच एक एजन्सी नेमणार असल्याचे उपमुख्यमंत्री अजित पवार यांनी सांगितले.(Ajit Pawar Warns OfficialsNo More Just Installing Nameplates)
पुणे जिल्ह्याच्या २०२५-२६ या आर्थिक वर्षातील जिल्हा नियोजन समितीच्या (डीपीसी) बैठकीत अजित पवारांनी या बैठकीत प्रशासकीय अधिकाऱ्यांना चांगलेच धारेवर धरले. केवळ अधिकारीच नव्हे तर जिल्ह्यातील सर्वच आमदारांना विकास कामे वेळेत करण्याबाबत सूचना केल्या. बैठकीला जिल्ह्यातील सर्व आमदार उपस्थित होते. मात्र मावळचे खासदार श्रीरंग बारणे वगळता अन्य खासदार अनुपस्थित होते. खासदार अमोल कोल्हे यांची बैठकीकडे पाठ फिरवली. तर खासदार सुप्रिया सुळे यांनी आधीच पत्र लिहून बैठकीला गैरहजर राहणार असल्याचं सांगितलं होते. केंदीय मंत्री मुरलीधर मोहोळ यांच्या पुतण्याचे लग्न असल्याने ते ही बैठकीला हजर नव्हते.
पत्रकारांशी बोलताना पवार म्हणाले, जिल्ह्यातील विविध विकास कामाचा दर्जा उत्तम राहील व अधिकाऱ्यांनी त्यांच्यावर टाकलेली जबाबदारी व्यवस्थित पार पडली पाहिजे यासाठी ही बैठक घेतली. यासाठी जे निर्णय घ्यायचे होते ते या बैठकीत घेतली गेले. जिल्ह्याचे प्रतिनिधित्व करत असलेल्या सर्व २१ आमदारांनी यावेळी अनेक विधायक सूचना केल्या आहेत. तसेच विविध कामांचे सादरीकरणही केले. पुढील तीन वर्षात जिल्ह्यातील पानंद रस्ते व गावांना जोडणारे शिवे वरचे रस्ते पूर्ण करण्याचे नियोजन करण्यात आले आहे. जिल्हा नियोजन समितीने सुचवलेला कामांचा दर्जा चांगला राखून, ही कामे डिसेंबर अखेर पूर्ण करण्याचे उद्दिष्ट ठेवण्यात आले आहे. राज्य सरकारने दिलेला पै न पै योग्य प्रकारे खर्च झाला पाहिजे याची जबाबदारी आम्ही लोकप्रतिनिधी घेतली पाहिजे व त्याला अधिकाऱ्यांनीही योग्य प्रतिसाद दिला पाहिजे अशा सूचना यावेळी देण्यात आल्या असल्याचे पवार यांनी सांगितले.
महापालिका आयुक्तांना पवार यांनी झापले
शहरातील विविध विकासकामांवरून अजित पवार यांनी पुणे महापालिका आयुक्त डॉ. राजेंद्र भोसले यांना बैठकीत चांगलेच झापले. महात्मा फुले वाड्याच्या विकासासाठी दोनशे कोटी रुपये देऊनही काही हालचाली दिसत नाही, शहरातील नदीपात्र परिसरातील काही जागा महापुरुषांच्या नावाखाली बळकावल्या जात आहेत, विद्यार्थ्यांच्या वसतिगृहाचे काम धिम्यागतीने सुरू असल्याने अजित पवार यावेळी चांगलेच संतप्त झाले होते.
