विशेष प्रतिनिधी
छत्रपती संभाजीनगर: मुख्यमंत्री लाडकी बहिण योजने वरून महायुतीत श्रेयाची लढाई सुरु झाली आहे. यावरून भारतीय जनता पक्षाचे प्रदेशाध्यक्ष चंद्रशेखर बावनकुळे यांनी उपमुख्यमंत्री एकनाथ शिंदे यांना चांगलेच फटकारले आहे.
मुख्यमंत्री लाडकी बहिण योजना मी आणली, माझी संकल्पना आहे असे एकनाथ शिंदे म्हणतात, त्यावर बावनकुळे म्हणाले की, “एकनाथ शिंदे मुख्यमंत्री असताना मुख्यमंत्री माझी लाडकी बहिण योजना महाराष्ट्रात आली. महायुतीच सरकार असताना आली. तेव्हा एकनाथ शिंदे यांचं सरकार होतं. मुख्यमंत्री सरकारचे प्रमुख असतात. त्यामुळे ते म्हणत असतील, मी योजना आणली, तर त्यात काही गैर नाही”
महायुतीत पालक मंत्री पदावरून वाद सुरू आहेत. महाडचे आमदार भरत गोगावले यांच्या समर्थकांनी रायगडच्या पालक मंत्रीपदावरुन आंदोलन केले. अशी आंदोलने त्या पक्षाच्या नेतृत्वाने थांबवली पाहिजेत. रस्त्यावरील आंदोलने योग्य नाहीत. नाशिकमधील भाजपची प्रदर्शने आम्ही रोखली. एकनाथ शिंदे यांनी दखल घ्यावी असा दमही बावनकुळे यांनी दिला आहे.
संभाजी नगर येथील उद्धव ठाकरे यांच्या पदाधिकाऱ्यांचा काल प्रवेश झाला. आज 15 सरपंच आणि प्रमुख पदाधिकाऱ्यांनी प्रवेश केलाय. उद्धव ठाकरे यांचे पदाधिकारी अस्वस्थ आहेत. प्रमुख नेते काँग्रेस आणि राष्ट्रवादी समोर लोटांगण घालत आहेत. दोन-तीन वर्षात उद्धव ठाकरेंना नगरपालिका, जिल्हा परिषद लढावायला देखील माणसं मिळणार नाहीत. पक्ष प्रवेश भाजपला उभारी देणारा असेल, असे बावनकुळे म्हणाले.
ते म्हणाले, भाजपच मिशन पहिल्या पासून सुरु होतं. लोकसभेत आम्ही महाविजय मिळवला. विधानसभेत महाविजय मिळवला. 2025 मध्ये स्थानिक स्वराज्य संस्थांच्या निवडणुकीत महायुती म्हणून महाराष्ट्रात मोठ्या प्रमाणात लढणार आहोत. विधानसभेत चांगलं यश मिळालं, तसच स्थानिक स्वराज्य संस्थांच्या निवडणुकीतही यश मिळेल
मतांच्या लांगूलचालनासाठी काँग्रेसचे विचार स्वीकारले. उद्धव ठाकरेंच्या परभणी आणि नाशिकमधील रॅलीत पाकिस्तानी ध्वज फडकताना शिवसेना ठाकरे गटाच्या कार्यकर्त्यांनी बघितले. त्यामुळे कार्यकर्ते अस्वस्थ झाले. म्हणून भाजपमध्ये पक्ष प्रवेश सुरु आहेत” असं बावनकुळे यांनी सांगितले.
